- Advertisement -
ذہن و دل پر غموں کے سائے ہیں
جو تھے اپنے وہی پرائے ہیں
رنگ بھرنے کو جذب الفت کا
ہم نے خاکے کئی بنائے ہیں
راہ سے میں بھٹک نہیں سکتا
- Advertisement -
وقت نے رخ نئے دکھائے ہیں
آپ کے عشق میں یقیں کیجے
سیکڑوں رنج و غم اٹھائے ہیں
جن سے توہین تھی وفاؤں کی
راز سینے میں وہ چھپائے ہیں
آ گئی باغباں پہ ہر تہمت
آشیاں برق نے جلائے ہیں
لوگ کہتے ہیں سننے والوں نے
شعر عادلؔ کے گنگنائے ہیں
مأخذ : انکشاف سخن
شاعر:ظفر عادل قریشی
مزید غزلیں پڑھنے کے لیے کلک کریں۔
- Advertisement -
