افراد
کانشی : جیب کترا
بملا : اُستانی(جوان عورت)
گردھاری : کانشی کا ساتھی
پنڈت : کالا چور(بلیک میلر)
تین چار فالتو آدمی
****
ذیل کا مکالمہ شروع ہو تو اس کے عقب میں بازار کا صوتی منظر پیش کیا جائے۔ گاڑیوں۔ رکشاؤں۔ موٹروں اور راہ گزروں کا شور پیدا کیا جائے۔ ایسا معلوم ہو کہ بڑی بھیڑ بھاڑ ہے۔ (کھوے سے کھوا چھل رہا ہے)
ایک آدمی: ارے بھئی اوپر کیوں چڑھے آتے ہو۔ سجھائی نہیں دیتا۔
دوسرا: اماں کچھ ہوش کی دوا کرو۔۔۔۔۔۔
تیسرا: ارے بھائی کیوں دھکے دیتے ہو۔۔۔۔۔۔کچھ اس عورت کا تو لحاظ کرو۔بے چاری پس گئی ہے۔۔۔۔۔۔
چوتھا: تھوڑی سی جگہ بنا دو۔
کانشی: ہاں ذرا تم ہی ادھر ہٹ جاؤ۔۔۔۔۔۔بھئی کیا ہٹے ہو۔بیچاری کا بٹوہ ہی۔۔۔۔۔۔
(عورت سے)ٹھہرئیے میں اٹھا دیتا ہوں۔۔۔۔۔۔یہ لیجئے۔
بملا: (گھبراہٹ کے ساتھ)شکریہ۔
پہلا: اب یہ کیا ہورہا ہے۔۔۔۔۔۔راستہ صاف کیوں نہیں ہوتا؟
دوسرا: کہتے ہیں آگے چھکڑا اُلٹ گیا ہے۔
تیسرا: اتنے چھوٹے بازاروں میں چھکڑے آخر چلنے کیوں دیئے جاتے ہیں؟
چوتھا: یا تو بازار بڑے اور چوڑے کیئے جائیں یا ان چھکڑوں کا سائز چھوٹا کیا جائے۔
(بازار کی آمدورفت کا شور آہستہ آہستہ بند ہو جائے)
کانشی: (قہقہہ لگاتے ہوئے) بازار اور چھکڑے بڑے کیئے جائیں یا چھوٹے ہماری گاڑی تو چلتی ہی رہے گی۔۔۔۔۔۔ کیوں گردھاری؟
گردھاری: بھئی کیا کہنے ہیں تمہارے۔۔۔۔۔۔بس اب ذرا ان سبزوں کی بہار دکھلا دو
کانشی: بڑے بے صبرے ہو۔۔۔۔۔۔(وقفہ) اور اگر سبزے نہ ہوئے تو؟
گردھاری: تو تم کانشی جیب کترے نہیں کسی دفتر کے منشی ہو۔
کانشی: اماں ایسا کبھی ہوسکتا ہے کانشی کوئی آدمی تاکے اور اس کے پاس سے مال نہ نکلے۔۔۔۔۔۔لو دیکھو۔۔۔۔۔۔(کاغذوں کی کھڑکھڑاہٹ)۔۔۔۔۔۔زیادہ نہیں ہیں۔۔۔۔۔۔ دو سو کے نوٹ ہوں گے۔۔۔۔۔۔لو تم گنو۔۔۔۔۔۔ یہ کاغذ کیا ہے!
گردھاری: خط وط ہوگا۔۔۔۔۔۔نہیں لفافہ ہے۔۔۔۔۔۔ لوتم کھولو۔۔۔۔۔۔ لیکن میں تو کہتا ہوں۔ پانچ پیسے کا اسٹامپ لگا کر ڈاک میں ڈال دو۔۔۔۔۔۔ کیا یاد کرے گی۔
کانشی: کھول کے پڑھ لُوں تو کیا حرج ہے۔۔۔۔۔۔(لفافہ کھولنے کی آواز)۔۔۔۔۔۔
گردھاری: وہ نوٹ تمہاری جیب میں پسینے سے گیلے ہوئے ہیں یابٹوے ہی سے ایسے نکلے ہیں۔۔۔۔۔۔بھئی مفلسی میں آٹا گیلا سنا تھا۔۔۔۔۔۔ نوٹوں کا گیلاہونا نہیں سنا تھا۔۔۔۔۔۔ پورے دو سو ہیں۔۔۔۔۔۔ میں نے کہا تم نے پہلے گن تو نہیں لیئے تھے۔۔۔۔۔۔ارے تم تو خط بڑی دلچسپی سے پڑھ رہے ہو۔۔۔۔۔۔ ہاں تو کیا لکھتی ہیں شریمتی جی۔۔۔۔۔۔ عشق وشق کا قصہ تو نہیں۔۔۔۔۔۔ میں جو تم سے کہتا ہوں یہ چشمہ پہننے والی عورتیں بڑی عشق باز ہوتی ہیں۔۔۔۔۔۔ ہماری گلی میں ایک چشمہ لگانے والی عورت تھی۔۔۔۔۔۔ شکل و صورت سے بڑی خاموش اور سوچ بچارکرنے والی دکھائی دیتی تھی۔۔۔۔۔۔ لیکن بھئی کچھ ہمیں بھی بتاؤ کیا لکھا ہے۔۔۔۔۔۔
کانشی: گردھاری، بہت بُرا ہوا ہے۔
گردھاری: اچھا کب ہوا ہے؟
کانشی: (سوچتے ہوئے)میں کہتا ہوں بہت برا ہوا ہے۔۔۔۔۔۔لو تم خود پڑھ لو۔
(کاغذ کی کھڑکھڑاہٹ)
گردھاری: یہ آج تمہیں مذاق کیا سوجھا ہے۔۔۔۔۔۔ اچھی طرح جانتے ہو کہ میں پڑھ نہیں سکتا۔۔۔۔۔۔ اگر پڑھا لکھا ہوتا تو آج کیا جیبیں کاٹتا!
کانشی: کیا کرتے؟
گردھاری: سر کاٹتا(ہنستا ہے)۔۔۔۔۔۔لو اب بتاؤ کیا لکھا ہے اس خط میں۔
کانشی: یہ نوٹ بھی میرے حوالے کرو۔۔۔۔۔۔ میں انہیں واپس کرنا چاہتا ہوں۔
گردھاری: کیا کرنا چاہتے ہو۔۔۔۔۔۔ کہیں بہک تو نہیں گئے!
کانشی: اس کو ان روپوں کی بہت زیادہ ضرورت ہے۔۔۔۔۔۔ ہمارا کام ان کے بغیر بھی چل سکتا ہے مگر اس پر تو مصیبت کا پہاڑ ٹوٹ جائے گا۔
گردھاری: ذرا خط پھر دکھانا مجھے۔۔۔۔۔۔گیتا کا کوئی اشلوک تونہیں لکھ دیا اس نے۔۔۔۔۔۔بھئی عجیب بہروپئے ہو۔
کانشی: وہ کہیں مل جائے۔۔۔۔۔۔کہاں جاؤں۔۔۔۔۔۔ کدھر جاؤں۔۔۔۔۔۔ کچھ سمجھ میں نہیں آتا۔۔۔۔۔۔ میں نے بہت برا کیا ہے گردھاری۔۔۔۔۔۔ اس کو روپوں کی سخت ضرورت تھی۔ میرا پیشہ بہت بُرا ہے۔پر میرا دل بُرا نہیں۔مجھے صدمہ ہوا ہے۔۔۔۔۔۔بھگوان جانتا ہے مجھے بہت دکھ ہوا ہے۔۔۔۔۔۔وہ عورت بہت دکھی ہے۔۔۔۔۔۔تم نہیں جانتے وہ کتنی دکھی ہے۔۔۔۔۔۔میں۔۔۔۔۔۔ میں بڑا اتیا چاری ہوں۔۔۔۔۔۔اب میں کیا کروں۔۔۔۔۔۔
گردھاری: یہ نوٹ میرے حوالے کرو اور چمٹا ہاتھ میں لے کر سادھو بن جاؤ۔
کانشی: نہیں۔۔۔۔۔۔نہیں گردھاری۔۔۔۔۔۔ میں یک بیک بدل نہیں گیا۔۔۔۔۔۔ میں صرف اس عورت کے روپے واپس کرنا چاہتا ہوں۔۔۔۔۔۔ اس لیئے کہ وہ بے حد دکھی ہے۔۔۔۔۔۔ اگر نوٹوں کے ساتھ یہ خط نہ ہوتا تو۔۔۔۔۔۔تو ۔۔۔۔۔۔ میں جاتا ہوں اس کی تلاش میں۔
نوٹ:(’’میں جاتا ہوں اس کی تلاش میں‘‘ کہنے کے ساتھ ہی بازارکی آمدورفت کا شور شروع ہوجائے۔۔۔۔۔۔یہ شور اس طور پر شروع کیا جائے کہ پہلے مدھم ہو پھر آہستہ آہستہ تیز ہو جائے۔۔۔۔۔۔ اس سے ڈرامے کے مصنف کا یہ مطلب ہے کہ آوازوں اور موسیقی کے ذریعے سے کانشی کی جستجو ظاہر کی جائے۔ جوں جوں وقت گزرتا جائے۔ جستجو کی شدّت بڑھتی جائے۔ یہ بات یوں پیدا کی جاسکتی ہے کہ پہلے ٹکڑے میں صرف آدمیوں کی آمدورفت کا صوتی منظر پیش کیا جائے۔ پھر اس منظر کو دوسرے ٹکڑے میں تحلیل کیا جائے جس میں لوگوں کی آمدورفت اور رکشاؤں کے چلنے کی آواز بھی شامل ہو۔ تیسرے ٹکڑے میں لوگوں کی آمدورفت اور رکشاؤں کی آواز کے علاوہ موٹروں کی آواز بھی ہو۔۔۔۔۔۔ہر ٹکڑے میں ماحول اور ضرورت کے مطابق موسیقی بھی شامل کی جائے۔آخری ٹکڑے کو آہستہ آہستہ سمندر کی گنگناہٹ میں تحلیل کیا جائے۔یہ گنگناہٹ پہلے مدھم ہو پھر آہستہ آہستہ ابھر آئے اس گنگناہٹ پر پتھریلے فرش پر تھکے ہوئے قدموں کی آواز سپرامپوز کی جائے۔ قدموں کی یہ آواز چند لمحات تک جاری رہے۔ پھر بند ہو جائے۔ ایک لمحے تک سمندر یا دریا کی گنگناہٹ پیش منظر میں آجائے۔ ایک لہر کی آواز آئے اور کوئی موٹی اور گھناؤنی آواز میں کہے’’تم بڑے ظالم ہو‘‘۔۔۔۔۔۔ ایک اور لہر آئے اور وہی آواز آئے۔’’تم اسے تلاش نہیں کرسکے‘‘ ایک اور لہر آئے۔’’ جب اس نے بٹوہ خالی پایا ہوگا تو اس کی کیا حالت ہوئی ہوگی۔‘‘ ایک اور لہر آئے۔’’تم راکھشس ہو۔۔۔۔۔۔تم نے ایک بے کس عورت کو بہت دکھ پہنچایا ہے۔‘‘
کانشی: (مضطرب ہو کر)ل۔۔۔۔۔۔ل۔۔۔۔۔۔لیکن اس میں میرا کیا قصور ہے۔۔۔۔۔۔م۔۔۔۔۔۔ مجھے کیا معلوم تھا کہ۔۔۔۔۔۔
(لہریں گنگناتی ہیں)
کانشی: (ضمیر کی آواز سے متاثر ہو کر)۔۔۔۔۔۔میں بڑا ظالم ہوں۔۔۔۔۔۔ میں بڑا ظالم ہوں۔۔۔۔۔۔ میں راکھشس ہوں۔ میں نے ایک بے کس عورت کو بہت دُکھ پہنچایا ہے۔۔۔۔۔۔(وقفہ) اس کو ڈھونڈتے ڈھونڈتے میں تھک گیا ہوں۔۔۔۔۔۔ جانے اس وقت کہاں ہوگی۔
(ایک دم پانی میں کسی کے گرنے کی آواز آتی ہے۔۔۔۔۔۔پانی میں ہاتھ پاؤں مارنے کی آواز)
کانشی: (گھبرا کر) کون گرا۔۔۔۔۔۔ (پانی میں ہاتھ پاؤں مارنے کی آواز۔۔۔(پتھریلے فرش پر اضطراب کے ساتھ اِدھر اُدھر دوڑتا ہے۔۔۔۔۔۔پھر پانی میں کود جاتا ہے۔۔۔۔۔۔کودنے کی آواز۔۔۔۔۔۔چند لمحات تک پانی میں کشمکش جاری رہتی ہے۔۔۔۔۔۔حلق میں پانی جانے کی غرغرّاہٹ بھی سنائی دے پھر کچھ دیر کے لیئے خاموشی طاری ہو جائے۔ مگر عقب میں لہروں کی گنگناہٹ بدستور جاری ہے)
بملا: (ماندہ آواز میں)۔۔۔آپ نے مجھے کیوں بچایا۔۔۔۔۔۔مجھے ڈوبنے دیا ہوتا۔
کانشی: شکر ہے تم بچ گئیں(پھولے ہوئے سانس کے ساتھ)مگر تم نے پانی میں چھلانگ کیوں لگائی۔۔۔تم۔۔۔۔۔۔(حیرت سے)ت۔۔۔ت۔۔۔تم تو وہی عورت ہو۔۔۔۔۔۔(خوش ہو کر) میں نے تمہیں پالیا۔۔۔۔۔۔ میں نے آخر تمہیں پا لیا۔۔۔۔۔۔یہ پکڑو اپنے روپے۔۔۔۔۔۔(نوٹوں کی کھڑکھڑاہٹ)۔۔۔۔۔۔میں تمہیں صبح سے ڈھونڈ رہا ہوں۔۔۔۔۔۔ آہ۔ اگر تم مجھے نہ ملتیں تو بہت ممکن ہے میں نے بھی تمہاری طرح خود کشی کا ارادہ کرلیا ہوتا۔۔۔۔۔۔ تم۔۔۔۔۔۔تم۔۔۔۔۔۔اب ٹھیک ہونا؟۔۔۔۔۔۔چلو تمہیں کسی ڈاکٹر کے پاس لے چلوں۔۔۔۔۔۔!
بملا: تم کون ہو؟
کانشی: میں جیب کترا ہوں۔۔۔۔۔۔تمہارے بٹوے سے یہ دو سو کے نوٹ میں نے اڑائے تھے۔
بملا: تم نے۔۔۔۔۔۔تم نے میرے بٹوے سے نو ٹ نکالے تھے پر اب تمہیں کیا ہوگیا ہے۔۔۔۔۔۔تم مجھے ڈھونڈتے رہے۔۔۔۔۔۔تم مجھے کیوں ڈھونڈتے رہے۔۔۔۔۔۔تم نے یہ ہاتھ آیا ہوا مال مجھے کیوں واپس دینا چاہا؟
کانشی: نوٹوں کے ساتھ ایک خط بھی تو تھا جو تم نے۔۔۔۔۔۔
بملا: اوہ!۔۔۔۔۔۔تو۔۔۔۔۔۔تو وہ خط تم نے پڑھ لیا۔۔۔۔۔۔(افسردگی کے ساتھ)۔۔۔تم بھی میرے راز سے واقف ہوگئے۔۔۔۔۔۔ اب ایک کے بجائے دو ہوگئے۔۔۔۔۔۔میں مرکیوں نہ گئی۔۔۔۔۔۔(روناشروع کردیتی ہے)
کانشی: مجھے تمہارے راز سے کوئی واسطہ نہیں۔۔۔۔۔۔ خط پڑھ کر مجھے افسوس ہوا کہ میں نے ایک ایسی عورت کے روپے نکالے ہیں جو بے حد دُکھی ہے۔۔۔۔۔۔ تم نے یہ دوسو روپے کس مشکل سے جمع کیئے ہوں گے۔۔۔۔۔۔ میں اب تم سے کیا کہوں مجھے کتنی ندامت ہے۔۔۔۔۔۔ مجھے بہت دُکھ ہوا ہے۔۔۔۔۔۔ میں۔۔۔۔۔۔ شرمسار ہوں۔۔۔۔۔۔ لیکن اب میرا بوجھ کچھ ہلکا ہوگیا ہے کہ میں نے تمہیں پالیا ہے۔ بچالیا ہے۔
بملا: (روتے ہوئے) نہیں۔ میں سمجھتی ہوں جو کچھ میں نے کیا ٹھیک تھا۔ مجھے مر جانا چاہیئے۔۔۔۔۔۔ جی کر بھی تو میں مری رہتی ہوں پھر اور جینے سے کیا فائدہ۔۔۔۔۔۔میں ڈرتی ہوں۔۔۔۔۔۔میں ڈرتی ہوں۔۔۔۔۔۔
کانشی: کس سے۔۔۔۔۔۔
بملا: میں ڈرتی ہوں کہ تم بھی میرے جیون پر کالے بھوت کی طرح چھا جاؤ گے۔ تم بھی میرے راز کا سودا کرنا شروع کردو گے۔۔۔۔۔۔ تم جیبیں کترنا چھوڑ دو گے میرا دل کترنا شروع کردو گے۔۔۔۔۔۔ تم جانتے ہو۔۔۔۔۔۔خط پڑھنے کے بعد تم کیا کچھ نہیں جانتے۔
کانشی: دیوی میں جیب کترا ضرور ہوں۔۔۔۔۔۔ لیکن انسان بھی ہوں مجھے تم سے پوری پوری ہمدردی ہے۔۔۔۔۔۔ مجھے معاف کردو۔۔۔۔۔۔(وقفہ )تم بڑی بہادر عورت ہو۔
بملا: لیکن اس بات کو کتنے آدمی جانتے ہیں۔۔۔۔۔۔ کسے معلوم ہے کہ گرلز اسکول کی ایک اُستانی۔۔۔۔۔۔ ایک کمزور اور نحیف عورت چار برس سے ایک راکھشس کو اپنا خون پلا رہی ہے۔ اس جرم کی پاداش میں کہ اس نے محبت کی اور ماں بن گئی۔۔۔۔۔۔محبت مٹ گئی لیکن اس کی تھکاوٹ باقی ہے۔۔۔۔۔۔بچی مر گئی مگر مامتا ابھی تک زندہ ہے۔۔۔۔۔۔یہ دو لاشیں ہیں جن کو وہ اپنے سینے سے لگائے کچھ دن جینا چاہتی تھی۔۔۔۔۔۔ لیکن اس کی قیمت طلب کی گئی اس لیئے کہ دنیا بیوپار پر چلتی ہے۔ یہاں دُکھ بھی مفت نہیں ملتے۔روگ لگاؤ اور اس کے دام دو۔اس دنیا کا اصول ہے۔۔۔۔۔۔عورت کی ایک کمزوری چو منزلہ مکان کے مقابلے میں زیادہ نفع بخش ہے۔۔۔۔۔۔یہ کسی بیوپاری مرد کے ہاتھ میں آجائے تو وہ اس سے ماہ بہ ماہ کرایہ وصول کرتا رہتا ہے۔۔۔۔۔۔تم جانتے ہی ہو کہ میں۔۔۔۔۔۔
کانشی: ۔۔۔۔۔۔میں جانتا ہوں۔۔۔۔۔۔لیکن میں پوچھتا ہوں تم نے اپنی زندگی کو خواہ مخواہ یہ روگ کیوں لگا رکھا ہے۔۔۔۔۔۔تم اس سے ڈرتی کیوں ہو۔۔۔۔۔۔ تم نے کسی کی چوری نہیں کی۔۔۔۔۔۔ ڈاکہ نہیں ڈالا۔۔۔۔۔۔ تمہیں کس بات کا ڈر ہے؟
بملا: میں نے چوری کی نہیں۔۔۔۔۔۔ میں نے ڈاکہ نہیں ڈالا جبھی تو میں ڈرتی ہوں۔۔۔۔۔۔تم دوسروں کی جیب کاٹتے ہو اور نہیں ڈرتے۔میں اپنی جیب کٹواتی ہوں اسی لیئے ڈرتی ہوں۔۔۔۔۔۔
کانشی: تم۔۔۔۔۔۔تم مجھے کوسے جارہی ہو۔۔۔۔۔۔ پرماتما کے لیئے اب جانے دو۔۔۔۔۔۔میں تم سے سچ کہتا ہوں سب کا سب اچھا ہوں۔۔۔۔۔۔ایک صرف میری انگلیاں بُری ہیں۔۔۔۔۔۔میں چاہتا ہوں کہ یہ بھی اچھی بن جائیں مگر۔۔۔۔۔۔
بملا: تم نے کبھی ان کو اچھا بنانے کی کوشش نہیں کی۔۔۔۔۔۔ کوشش کرو تو ہو سکتا ہے۔۔۔۔۔۔کیا تم سچ مچ اچھا بننا چاہتے ہو؟
کانشی: ہاں بشرطیکہ۔۔۔۔۔۔
بملا: میں تمہیں اچھا بناؤں گی۔۔۔۔۔۔آج ہی سے میں تمہیں سدھارنے کا کام شروع کردوں گی۔ مگر تم مجھ سے وعدہ کرو جو کچھ میں کہوں تم مان لو گے۔
کانشی: میں وعدہ کرتا ہوں۔
(سمندرکی لہروں کی آواز عقب سے نکل کر پیش منظر میں آجائے اور چند لمحات کے بعد فیڈ ہو جائے۔)
(فرش پر ٹہلنے کی آواز۔۔۔۔۔۔کبھی قدم رک جائیں کبھی چلنا شروع کردیں۔۔۔۔۔۔یہ سلسلہ چند لمحات تک جاری رہے۔۔۔۔۔۔ اس دوران میں کہ ایک دو بار کانشی منہ سے سیٹی بھی بجائے۔)
بملا: (حیرت کے ساتھ)کانشی!
کانشی: (گھبرا کر)۔۔۔کون۔۔۔۔۔۔؟
بملا: یہ تم کیا کررہے تھے؟
کانشی: کچھ بھی نہیں(گھبراہٹ کے ساتھ)ک۔۔۔ک۔۔۔کچھ بھی نہیں۔
بملا: میں سب کچھ دیکھ چکی ہوں پر میں پوچھتی ہوں کہ یہ حرکت کیا تھی؟
کانشی: میں۔۔۔۔۔۔میں نے کیا کیا ہے۔۔۔۔۔۔ سارا دن اس کمرے میں۔۔۔۔۔۔بیٹھا تمہاری دی ہوئی کتابیں پڑھتا رہتا ہوں۔۔۔۔۔۔ میں نے ایک قدم باہر نکالا۔۔۔۔۔۔ایک۔۔۔۔۔۔ ایک مہینے سے کہیں باہر نہیں گیا۔۔۔۔۔۔ تمہارے سوا کسی آدمی کی شکل تک میں نے نہیں دیکھی۔۔۔۔۔۔یہ۔۔۔۔۔۔کتابیں جو تم نے مجھے دی ہیں سب کی سب میں نے پڑھ ڈالی ہیں۔۔۔۔۔۔ اب بتاؤ میں کیا کروں؟
بملا: جو کچھ میں نے پوچھا ہے اس کا پہلے جواب دو۔۔۔۔۔۔ تم ابھی ابھی کیا کررہے تھے۔۔۔۔۔۔ تم نے اپنا کوٹ یہاں کھونٹی پر کیوں نہیں لٹکایا تھا؟۔
کانشی: تم دیکھ تو چکی ہو۔
بملا: تو یہ ٹھیک ہے کہ تم۔۔۔
کانشی: ہاں ٹھیک ہے۔۔۔۔۔۔ میں نے اپنے کوٹ کی جیب سے سگریٹ کی ڈبیا نکالی تھی اور پھر وہیں ڈال دی تھی۔۔۔۔۔۔ میں نے اسی طرح دو مرتبہ اپنا بٹوہ بھی نکالا تھا۔۔۔۔۔۔ مگر تم مجھے ایسی ملامت بھری نظروں سے کیوں دیکھ رہی ہو۔۔۔۔۔۔ یہ کوٹ میرا اپنا ہی تو ہے اور اس میں جو چیزیں پڑی ہیں وہ بھی تو میری ہیں۔۔۔۔۔۔ میں اپنی جیبوں میں سے اپنی ہی چیزیں نکال رہا تھا۔۔۔۔۔۔ اس میں کیا حرج ہے؟
بملا: کانشی۔۔۔۔۔۔ تمہاری حالت قابل رحم ہے۔۔۔۔۔۔تم اتنے بگڑ چکے ہو کہ تمہیں سدھارنا بہت ہی کٹھن کام ہے۔۔۔۔۔۔ میں تو ناامید ہو چلی ہوں۔
کانشی: لیکن بملا کچھ غور تو کرو۔۔۔۔۔۔ یوں چٹکیوں میں تو ایسے کام نہیں ہوسکتے۔ یہ بھی تو سوچو کہ میں کتنے برسوں سے جیبیں کاٹ رہا ہوں۔ ایک مہینے میں تم میری یہ عادت کیسے دور کرسکتی ہو۔۔۔۔۔۔ میں تو کہتا ہوں۔ جتنی جلدی یہ عادت دور ہو جائے اتنا ہی اچھا ہے پر یہ انگلیاں تو آہستہ آہستہ ہی راہ پر آئیں گی۔۔۔۔۔۔ تم ناامید ہو جاؤ گی تو میرا کیا بنے گا۔۔۔۔۔۔ میں تو دھوبی کا کتا بن جاؤں گا۔ نہ گھاٹ کارہوں گا نہ گھر کا۔۔۔۔۔۔ پرماتما کے لیئے نراش نہ ہو۔۔۔۔۔۔ میں ضرور ایک دن ان انگلیوں کو ٹھیک کرلوں گا۔
بملا: تمہیں دراصل پرائے مال پر ہاتھ صاف کرنے کا چسکا پڑا ہوا ہے تم کبھی درست نہیں ہوسکتے۔۔۔۔۔۔ تم نے آج تک خود کما کر کھایا ہو تو تمہیں ان باتوں کا علم ہو۔تم کیا جانو کہ محنت مشقت کیا بلا ہے۔۔۔۔۔۔ میری طرف دیکھو دن رات محنت کرتی ہوں۔۔۔۔۔۔ سو روپے مجھے ماہوار ملتے ہیں۔
کانشی: جن میں پچاس۔۔۔۔۔۔نہیں پچاس نہیں سترّ وہ آدمی وصول کرلیتا ہے۔
بملا: (فخر کے ساتھ) چا ہیئے تو یہ تھا کہ مجھے ہر طرح کا آرام میسر ہوتا مگر۔۔۔۔۔۔تم دیکھ چکے ہو۔۔۔۔۔۔تم جانتے ہو کہ ایک نکما فونٹین پن بھی میں خرید نہیں سکتی حالانکہ دوسروں کے پاس اچھے اچھے قلم دیکھ کر روز میرا جی للچاتا ہے مگر مجبوری ہے۔۔۔۔۔۔سینے پر پتھر رکھ کر کام کیئے چلی جارہی ہوں اس لیئے کہ مجھے جینا ہے۔۔۔۔۔۔ ایک تم ہو کہ اپنی انگلیوں کو قابو میں نہیں لا سکتے۔۔۔۔۔۔ تمہارے پیشِ نظر تو پھر کوئی منزل ہے لیکن میں تو منزل کی تلاش میں بھٹک رہی ہوں تم بڑے بدقسمت ہو۔۔۔۔۔۔
کانشی: مجھے معاف کرو۔۔۔۔۔۔ میں۔۔۔۔۔۔ ۔۔۔۔۔۔ اب ایسی حرکت نہیں کروں گی میں سچے دل سے وعدہ کرتا ہوں کہ پھر ایسی حرکت نہیں کروں گا۔۔۔۔۔۔
بملا: بہت اچھا۔۔۔۔۔۔ لیکن سن لو اگر پھر تم نے مجھے ناامید کیا تو میں تمہیں بالکل چھوڑ دُوں گی۔۔۔۔۔۔ تو اب میں جاتی ہوں سکول کا وقت ہوگیا ہے۔۔۔۔۔۔(جانے کی آواز۔۔۔۔۔۔پھر دروازہ بند کرنے کی کھڑکھڑاہٹ)۔
(بازار کی آمدورفت کا شور گاڑیوں، موٹروں اور رکشاؤں کی ملی جلی آوازیں۔۔۔۔۔۔آوازوں کے اس پردے پر ذیل کا ٹکڑا سپر امپوز کیا جائے)
(بملا) چاہیئے تو یہ تھا کہ مجھے ہر طرح کا آرام میسر ہوتا۔ مگر تم جانتے ہو کہ میں بہت دُکھی ہوں ایک پل مجھے چین نہیں ملتا میری مظلومیت کی انتہا یہ ہے کہ میں ایک نکما فونٹین پن بھی خرید نہیں سکتی حالانکہ دوسروں کے پاس اچھے اچھے قلم دیکھ کر روز میرا جی للچاتا ہے۔ مگر مجبوری ہے۔۔۔
(گاڑیوں وغیرہ کا شور)
(بملا) میری مظلومیت کی انتہا یہ ہے کہ میں ایک نکماّ سا فونٹین پن بھی نہیں خرید سکتی۔(گاڑیوں وغیرہ کا شور آہستہ آہستہ فیڈ ہو جائے)
(بملا) دوسروں کے پاس اچھے اچھے قلم دیکھ کر روز میرا جی للچاتا ہے۔
(گاڑیوں وغیرہ کا شور آہستہ آہستہ فیڈ آوٹ ہو جائے)
بملا: تو کل تم نے خوب بازاروں کی سیر کی۔۔۔۔۔۔ سارا دن گھومتے رہے۔
کانشی: (ذہنی انتشار کے ساتھ)ہاں سارا دن گھومتا رہا۔
بملا: آج موسم کتنا اچھا ہے۔۔۔۔۔۔آسمان کا رنگ میری چوڑیوں کی طرح نکھرا ہوا ہے۔
کانشی: ہاں چوڑیوں کا رنگ آسماں کی طرح نکھرا ہوا ہے۔
بملا: یہ چوڑیاں تمہیں پسند ہیں؟
کانشی: جب دکان پر تھیں تو اتنی خوبصورت نہیں تھیں مگر اب تو۔۔۔۔۔۔
بملا: (ہنستی ہے) تم مجھے بناؤ نہیں۔۔۔۔۔۔
کانشی: آج تمہاری سالگرہ ہے نا۔۔۔۔۔۔
بملا: ہے تو سہی۔۔۔۔۔۔لیکن۔۔۔۔۔۔
کانشی: (ذہنی انتشار کے ساتھ)سالگرائیں اچھی ہوتی ہیں۔
بملا: یہ تم کیا اوٹ پٹانگ باتیں کرتے ہو؟
کانشی: (گھبرا کر) نہیں تو۔۔۔میں۔۔۔ میں دراصل کچھ اور ہی سوچ رہا تھا(وقفہ) میں سوچتا ہوں، میں نے کئی مرتبہ سوچا ہے کہ اب دنیا میں میری حیثیت ایک فالتو آدمی کی سی ہوگئی ہے۔۔۔۔۔۔ چھکڑے میں اگر پانچواں پہیہ لگا دیا جائے تو میری حالت کا اندازہ کیا جاسکتا ہے۔۔۔۔۔۔لیکن نہیں۔۔۔۔۔۔میں۔۔۔۔۔۔میں۔۔۔۔۔۔ اپنے آپ کو کارآمد بنا سکتا ہوں۔۔۔۔۔۔ایسا ہوسکتا ہے۔۔۔۔۔۔تم ہو۔۔۔۔۔۔ یعنی تم مجھ پر اتنی مہربان ہو کہ کیا کچھ نہیں ہوسکتا ہے۔۔۔۔۔۔میرا مطلب ہے کہ۔۔۔۔۔۔ کچھ نہیں۔۔۔ تم کتنی اچھی ہو بملا۔۔۔میرا جی چاہتا ہے کہ تمہاری خدمت کروں۔۔۔۔۔۔خدمت۔۔۔۔۔۔خدمت۔۔۔۔۔۔ہاں میرا جی چاہتا ہے کہ تمہیں خوش کرنے کے لیئے کچھ نہ کچھ ضرور کروں۔
بملا: کانشی مجھے ایسا محسوس ہوتا ہے کہ تم مجھ سے کچھ چھپا رہے ہو۔
کانشی: (اور زیادہ گھبرا کر)ن۔۔۔ن۔۔۔ نہیں تو۔
بملا: دیکھو کانشی لڑائی ہو جائے گی۔تم جھوٹ بول رہے ہو۔
(وقفہ)
بملا: بولو۔سوچ کیا رہے ہو۔
(وقفہ)
کانشی: میں۔۔۔۔۔۔ میں تمہارے لیئے ایک تحفہ لایا ہوں۔۔۔۔۔۔قبول کرو گی!
بملا: پہلے مجھے تحفہ دکھاؤ۔
کانشی: فونٹین پن ہے۔۔۔۔۔۔ یاد ہے تم نے اس روز کہا تھا۔’’ میری مظلومیت کی یہ انتہا ہے کہ میں ایک نکما فونٹین پن نہیں خرید سکتی حالانکہ دوسروں کے پاس اچھے قلم دیکھ کر روز میرا جی للچاتا ہے‘‘۔۔۔۔۔۔ میں کل بازار گیا تو یہ قلم تمہارے لیئے۔۔۔۔۔۔
بملا: دکھاؤ تو۔
کانشی: یہ لو۔
بملا: بہت اچھا ہے۔۔۔۔۔۔بڑھیا قلم ہے۔
کانشی: تمہیں پسند آگیا؟
بملا: کیوں نہیں۔۔۔(وقفہ)لیکن تم نے یہ لیا کہاں سے؟
کانشی: لیا کہاں سے۔۔۔۔۔۔(حلق میں جیسے کچھ پھنس گیا ہے)لیا کہاں سے۔
بملا: بولو کہاں سے لیا؟
کانشی: (ندامت بھرے لہجے میں)۔۔۔۔۔۔ ایک راہ چلتے آدمی کی جیب سے۔
بملا: (قلم زمین پر پٹکنے کی آواز)۔۔۔کانشی۔۔۔۔۔۔تم۔۔۔۔۔۔تم۔۔۔۔۔۔کانشی تم نے مجھے کیا سمجھ رکھا ہے جو چوری کی یہ چیز تم نے مجھے تحفے کے طور پر دی ہے۔۔۔۔۔۔میں نے تم سے کیا پہلے ہی نہیں کہا تھا کہ تم کبھی درست نہیں ہوسکتے۔چوری چکاری تمہارے رگ و ریشہ میں سرایت کر چکی ہے۔۔۔۔۔۔تم۔۔۔۔۔۔تم بہت ہی ذلیل آدمی ہو۔
کانشی: مگر۔۔۔۔۔۔مگر۔۔۔۔۔۔
بملا: میں کچھ سُننے کو تیار نہیں۔۔۔۔۔۔تم بڑے ہی ذلیل آدمی ہو۔۔۔۔۔۔ کیا تم سمجھ رہے تھے کہ چوری کا یہ مال لے کر میں خوش ہو جاؤں گی۔۔۔۔۔۔
کانشی: مگر۔۔۔۔۔۔مگر۔۔۔۔۔۔بملا تممیری بات تو سن لو۔۔۔۔۔۔ میں قصور وار ہوں لیکن۔۔۔۔۔۔لیکن۔۔۔۔
بملا: لیکن لیکن کیا؟
کانشی: تم ذرا سوچو تو؟۔۔۔۔۔۔ یعنی جو کچھ میرے دل میں ہے اس کا تو کھوج لگاؤ۔۔۔۔۔۔میں نے۔۔۔۔۔۔میں نے۔۔۔۔۔۔ میں نے یہ قلم اس لیئے نہیں اُڑایا تھا کہ تم اسے لے کر خوش ہو جاؤ گی۔۔۔۔۔۔ اس روز جب تم نے کہا’’میری مظلومیت کی انتہا یہ ہے کہ میں ایک نکما فونٹین پن بھی نہیں خرید سکتی تو یقین مانو میری آنکھوں میں آنسو آگئے تھے۔۔۔۔۔۔ میں۔۔۔۔۔۔ میں اب اپنے دل کا حال کیسے بیان کروں۔۔۔۔۔۔میں جا نتا ہوں میں نے غلطی کی ہے۔ میں نے تمہیں پھر ناامید کیا ہے۔ مگر میں کیا کروں۔ راہ چلتے ہوئے آدمی کی جیب میں جب میں نے یہ قلم دیکھا تو اپنے آپ میری انگلیوں میں حرکت پیدا ہوئی اور۔۔۔۔۔۔ یہ قلم میرے پاس تھا مجھے بہت افسوس ہے۔۔۔۔۔۔ میں سخت نادم ہوں۔
بملا: تم کبھی درست نہیں ہوسکتے۔جیبیں کترنے کی عادت پک کر تمہاری طبیعت بن گئی ہے۔۔۔۔۔۔
کانشی: (وقفہ۔۔۔۔۔۔غمگین آواز میں) تم ٹھیک کہتی ہو۔
بملا: مجھے افسوس اس بات کا ہے کہ باوجود پوری کوشش کے میں تمہیں درست نہ کرسکی۔۔۔۔۔۔ تم بہت زیادہ بگڑ چکے ہو۔
کانشی: تمہارا کہنا بالکل ٹھیک ہے۔۔۔۔۔۔لیکن اب میں کیا کروں۔
بملا: جاؤ جو جی میں آئے کرو۔۔۔۔۔۔(بھراّئی ہوئی آواز میں)لوگوں کی جیبیں کاٹو چوری کرو۔۔۔۔۔۔ڈاکے ڈالو۔۔۔۔۔۔ تمہیں اس بات کی کیا خبر ہے کہ مَیں۔۔۔۔۔۔مَیں۔۔۔۔۔۔(اور زیادہ رونا شروع کردیتی ہے)
کانشی: پرماتما کے لیئے تم روؤ نہیں۔۔۔۔۔۔ میں اچھا ہو جاؤں گا۔۔۔۔۔۔میں اچھا بننے کی پوری کوشش کروں گا۔۔۔۔۔۔ میں جاتا ہوں۔۔۔۔۔۔ اپنے آپ کو دُرست کرلوں پھر تمہیں اپنا منہ دکھاؤں گا۔۔۔۔۔۔ اچھا تو پھر ملیں گے اگر۔۔۔۔۔۔(آواز بھرا جاتی ہے)۔۔۔۔۔۔
(بملا کی سسکیاں۔۔۔۔۔۔آہستہ آہستہ ان کو فیڈآوٹ کردیا جائے)
۔۔۔۔۔۔۔۔۔۔۔۔۔۔۔۔۔۔۔۔۔
پنڈت: میں اس معاملے پر زیادہ گفتگو نہیں کرنا چاہتا۔۔۔۔۔۔بڑی سیدھی سی بات ہے کہ میں یکمشت تم سے کچھ روپے لے کر تمہارے خط تمہارے حوالے کرسکتا ہوں۔
بملا: میرا راز آپ میرے ہی پاس بیچ رہے ہیں۔
پنڈت: مجھے چھان بین پسند نہیں۔۔۔۔۔۔ تمہیں ان خطوں کی ضرورت ہے اور مجھے یکمشت کچھ روپوں کی۔۔۔۔۔۔کیا تمہیں یہ سودا قبول ہے۔۔۔۔۔۔ خط حاصل کرنے کے بعد تمہیں کسی بات کا کھٹکا نہیں رہے گا۔۔۔۔۔۔ یہ بات خاص طور پر قابل غور ہے۔
بملا: میں اچھی طرح غور کر چکی ہوں پر میں سوچتی ہوں کہ اس میں بھی آپ کی کوئی نئی عیّاری چھپی ہوئی ہے۔
پنڈت: تمہارے شبہات بالکل غلط ہیں میں ایک سودا کرنا چاہتا ہوں اگر تمہیں منظور ہو تو ٹھیک ورنہ۔۔۔۔۔۔
بملا: کتنے میں آپ فیصلہ کرنا چاہتے ہیں؟
پنڈت: صرف پانچ سو روپوں میں۔
بملا: یہ تو بہت ہوئے۔
پنڈت: اس سے کم میں سودا نہیں ہوسکتا۔
بملا: سارے خط آپ کے پاس اس وقت ہیں۔
پنڈت: نہیں جب سودا پکا ہو جائے گا۔ میں لے آؤں گا۔
بملا: تو۔۔۔۔۔۔(وقفہ)۔۔۔۔۔۔تو آپ۔۔۔۔۔۔ تو آپ ایسا کیجئے۔۔۔۔۔۔کیا آپ پوری بندر کے اسٹیشن پر مل سکتے ہیں۔۔۔۔۔۔یعنی کیا آپ میرا کل پوری بندر اسٹیشن پر ایک دو بجے کے درمیان انتظار کرسکتے ہیں؟
پنڈت: یہ سب ہو جائے گا مگر سوال یہ ہے۔۔۔
بملا: آپ کا سودا مجھے منظور ہے۔۔۔۔۔۔میں کل روپے لے آؤں گی۔ آپ سارے خط لے آئیے گا۔۔۔۔۔۔ دیکھئے کوئی باقی نہ رکھئے گا۔۔۔۔۔۔ اور۔۔۔۔۔۔اور۔۔۔۔۔۔ میں ایک اور دو بجے کے درمیان پوری بندر اسٹیشن پر پہنچ جاؤں گی۔۔۔۔۔۔ آ پ خط ڈالنے والے بکس کے پاس کھڑے رہیئے گا۔۔۔۔۔۔ میں سیدھی وہیں آ جاؤں گی۔۔۔۔۔۔ تو یہ طے ہوگیا نا؟
پنڈت: ہاں طے ہے۔۔۔۔۔۔ میں وہاں مقررہ وقت پر پہنچ جاؤں گا۔۔۔۔۔۔تو اب میں جاتا ہوں۔۔۔۔۔۔ کل شاید ہماری آخری ملاقات ہوگی۔
بملا: پرماتما کرے ایسا ہی ہو۔۔۔۔۔۔تو آپ ایک اور دو بجے کے درمیان وہاں پہنچ جائیں گے؟
پنڈت: (ہنستے ہوئے) ہاں۔ ہاں پہنچ جاؤں گا۔۔۔
(ہنسی کی آواز آہستہ آہستہ دور ہوتی جائے پھر دروازہ بند کرنے کی آواز)
بملا: (اضطراب کے ساتھ)۔۔۔اب مجھے کانشی کو تلاش کرنا ہے۔۔۔۔۔۔وہ مل گیا توسب ٹھیک ہو جائے گا۔
(بازار کی آمدورفت کی آوازوں پر ذیل کے فقرے سپرامپوز کیئے جائیں)
بملا: کانشی کہاں ہے؟
گردھاری : تین چار روز سے ملاقات نہیں ہوئی۔گھر ہوگا۔
(جھانجھ)
بملا: آپ کو پتا ہے کانشی کہاں ہے۔
الف: جی نہیں۔
(جھانجھ)
بملا: کانشی کہاں ہے؟
ب: ہسپتال میں ہے۔
بملا: ہسپتال میں؟
ب: کسی نے مجھے بتایا تھا کہ وہ تین چار روز سے ہسپتال میں ہے۔ نہیں تین چار روز نہیں دس پندرہ روز سے کیونکہ اس نے مجھے یہ بھی بتایا تھا کہ بس اب وہ ہسپتال سے آنے ہی والا ہے۔
(جھانجھ)
بملا: کانشی!
کانشی: بملا!
(وقفہ)
کانشی: تم یہاں کیسے چلی آئیں؟
بملا: تم مجھے یہ بتاؤ اب تمہاری طبیعت کیسی ہے؟
کانشی: بالکل تندرست ہوں۔۔۔۔۔۔مجھے ہوا کیا تھا۔۔۔۔۔۔ ایسے ہی۔۔۔
بملا: تم بالکل ٹھیک ہو نا؟
کانشی: ہاں ہاں!
بملا: (آہستہ) مجھے تم سے ایک ضروری کام ہے۔۔۔۔۔۔ تم چل پھر سکتے ہو نا؟۔۔۔۔۔۔تمہیں یہاں سے جانے کی اجازت مل جائے گی نا؟
کانشی: ہاں ہاں۔۔۔۔۔۔ کیوں نہیں۔۔۔۔۔۔کہوتو ابھی تمہارے ساتھ چلنے کو تیار ہوں۔۔۔۔۔۔بتاؤ کیا کام ہے۔۔۔۔۔۔؟
بملا: (آہستہ) میں بتاتی ہوں۔۔۔۔۔۔ دیکھو کل ایک اور دو بجے کے درمیان پوری بندر اسٹیشن پر ایک آدمی آئے گا۔میں تمہیں اس کا حلیہ بتادوں گی۔
کانشی: بہت اچھا
بملا: اس آدمی کی کسی جیب میں خطوں کا ایک پلندہ ہوگا۔(وقفہ)۔۔۔ تم اسے اڑا لینا۔۔۔۔۔۔
(وقفہ)
بملا: وہ خط مجھے مل جائیں گے۔۔۔۔۔۔تم اڑا لو گے نا یہ خط میرے لیئے۔
(وقفہ)
بملا: چپ کیوں ہوگئے۔بولتے کیوں نہیں۔
کانشی: (غمگین آواز میں)بملا۔۔۔۔۔۔ میں اچھا بن چکا ہوں۔۔۔۔۔۔میں۔۔۔۔۔۔اپنے دونوں ہاتھوں کی انگلیاں کٹوا چکا ہوں۔۔۔۔۔۔یہ دیکھو۔۔۔۔۔۔(بملا زور سے چیختی ہے۔۔۔۔۔۔(فیڈ آؤٹ)
مأخذ : کتاب : منٹو کے ڈرامے اشاعت : 1942
مصنف:سعادت حسن منٹو
مزید ڈرامے پڑھنے کے لیے کلک کریں۔
