افراد
بلقیس : (آواز مضطراب ہو)
ثُریّا : (بلقیس کی چھوٹی بہن(شریر)
بلقیس کی ماں: (رعب دار آواز)
بلقیس کا بھائی:
بلقیس کا باپ:
(چھوٹی بچی کے ہنسنے کی آواز)
بلقیس: کھڑی ٹھی ٹھی ہنس رہی ہے تجھ سے جو کام کہا ہے وہ کر۔ یاد رکھ وہ کان اینٹھوں گی کہ بِلبلا اُٹھے گی(لہجہ بدل کر)۔۔۔۔۔۔جا میری بہن! بڑے طا ق سے میری چوڑیوں والا بکس اُٹھالا پر ایسے کہ امی جان کو کانوں کان خبر نہ ہو۔ جا! میری اچھی بہن جو ہوئی۔
ثُریّا: (ہنستے ہوئے)۔۔۔۔۔۔اور جو میں نہ لاؤں تو …….
ْْبلقیس: مجھے ہے ہے کر کے پیٹے۔ میرا مُردہ دیکھے۔۔۔۔۔۔لے اب سُن لیا! تجھے تو بڑی بہن کا کچھ لحاظ ہی نہیں۔ نگوڑی ہمسائیاں تجھ سے جو کام چاہیں کرالیں۔ ایک فقط مجھ اللہ ماری کا تو کوئی کام نہ کرے گی۔
ثُریّا: میں۔۔۔۔۔۔میں۔۔۔۔۔۔اپنی بہن کا ہر کام کروں گی۔ ہمسائیاں جائیں بھاڑ میں۔۔۔۔۔۔میری باجی اور ان کا کیا مقابلہ۔۔۔۔۔۔ تو چوڑیوں کا بکس طاق پر سے اُٹھا کر ایسے لاؤں کہ امی جان کو کانوں کان خبر نہ ہو۔۔۔۔۔۔ اچھا بھلا یہ تو بتائیے اس کام کے لیئے مجھے انعام کیا ملے گا۔
بلقیس: ثُریّا۔ مجھے نہ ستا۔ ایک نگوڑا میرا دل ویسے ہی خراب ہے۔ اوپر سے تو چھیڑخانی کررہی ہے۔ جا، اس وقت مجھے ہنسی ٹھٹھا اچھا نہیں لگتا۔۔۔۔۔۔ آدھا گھنٹہ باقی رہ گیا ہے اور مجھے جہان بھر کے کام کرنا ہیں۔۔۔۔۔۔
ثُریّا: کہاں جارہی ہیں آپ۔۔۔۔۔۔سینما دیکھنے؟۔۔۔۔۔۔سینما دیکھنے؟۔۔۔۔۔۔
آپ ضرور سینما دیکھنے جارہی ہیں جبھی تو چوڑیاں نکلوائی جارہی ہیں۔۔۔۔۔۔ میں آج آپ کے ساتھ نہ گئی تو میرا نام بھی ثُریّا نہیں۔
بلقیس: ثُریّا۔ تو اب زیادہ بک بک نہ کر۔ جتنا تجھ سے کہتی ہوں اتنا ہی مجھے تنگ کرتی ہے۔۔۔ تیری قسم میں سینما نہیں جارہی۔
ثریا: تو پھر یہ تیاریاں کس لیئے ہورہی ہیں۔
بلقیس: کیسی تیاریاں؟
ثُریّا: یہ نفیسیاں۔
بلقیس: میں نے کل کی پہن رکھی ہیں۔
ثُریّا: یہ لاکٹ!
بلقیس: اس کا پنڈنٹ خراب ہوگیا تھا۔ چار پانچ روز سے باہر پڑا تھا۔ ابّاجی نے ابھی تک سُنار کو بھجوایا ہی نہیں تھا۔ میں نے سوچا باہر پڑا پڑا اور خراب ہو جائے گا۔ اس لیئے پہن لیا۔
ثُریّا: اور یہ ساڑھی۔۔۔۔۔۔ یہ نئی سینڈل۔۔۔۔۔۔
بلقیس: یہ تو میرا امتحان لینے کیا بیٹھ گئی ہے اور میں بے وقوف نہیں جو تجھے ہر بات کا جواب دیئے چلی جارہی ہوں جیسے تو میری اماں ہے۔۔۔۔۔۔ چل دفعان ہو یہاں سے۔ میں اب تک لحاظ ہی کیئے جارہی تھی۔۔۔۔۔۔ہاں میں باہر جارہی ہوں۔ سنا ساڑھے آٹھ بجے مجھے وہاں پہنچ جانا ہے۔۔۔۔۔۔ اپنے آپ سے)چوڑیاں جائیں جہنم میں۔ نہ پہنوں گی تو کیا ہوگا اور پھر اس لعنتی سے تو کبھی بحث ختم ہی نہیں ہوگی۔۔۔۔۔۔
ثُریّا: آپا آپ ناراض ہوگئیں مجھ سے!
بلقیس: چل ہٹ دور ہو۔۔۔۔۔۔ تجھ سے کہہ جو دیا آج مجھے یہ چھیڑخانی اچھی نہیں لگتی۔ مجھے آج ضرور باہر جانا ہے پر مصیبت یہ ہے کہ امی جان اجازت نہیں دیں گی۔(بلقیس اپنے آپ سے کچھ ثُریّا سے) پچھلے تین روز سے متواتر شام کو باہر جا رہی ہوں۔ آج ان سے اجازت مانگی تو وہ بھلا کیا دیں گی۔۔۔۔۔۔
ہائے اللہ اب کیا ہوگا۔ میں ان سے وعدہ کر چکی ہوں کہ ٹھیک ساڑھے آٹھ بجے پہنچ جاؤں گی۔
ثُریّا: (بھولے پن سے)کس سے۔
بلقیس: (غیر ارادی طور پر)لطیف صاحب سے۔
ثُریّا: (حیرت سے) لطیف صاحب سے۔۔۔۔۔۔یہ لطیف صاحب کون ہیں؟
بلقیس: آٹھ بج کر اوپر دس منٹ ہوگئے ہیں اور۔۔۔۔۔۔اور۔۔۔۔۔۔ کیا کہا تو نے؟
ثُریّا: یہ لطیف صاحب کون ہیں؟
بلقیس: لطیف صاحب۔۔۔۔۔۔(چونک کر) مجھے کیا معلوم کون ہیں۔۔۔۔۔۔ار۔۔۔۔۔۔ار۔۔۔۔۔۔ سچ مچ یہ کون ہیں؟۔۔۔۔۔۔ثُریّا۔۔۔۔۔۔تو نے آج کا سبق یاد کیا۔۔۔۔۔۔کبھی نہیں کیا ہوگا۔
ثُریّا: یہ لطیف صاحب کون ہیں؟
بلقیس: کہہ جو دیا مجھے معلوم نہیں۔
ثُریّا: ابھی ابھی آپ ہی نے تو ان کا نام لیا تھا۔
بلقیس: ثُریّاتو اب بہت جھوٹ بولنے لگی ہے۔۔۔۔۔۔ میں بھلا کیوں کسی مردوے کا نام لُوں اور۔۔۔۔۔۔پھر کوئی ایسا آدمی بھی تو ہو۔۔۔۔۔۔ ہاں یہ تو بتا میں نے کہا کیا تھا۔
ثُریّا: کہا تھا کہ آپ نے کسی لطیف صاحب سے ساڑھے آٹھ بجے ملنے کا وعدہ کیا ہے۔
بلقیس: (بھنچے ہوئے لہجے میں)خاموش۔۔۔۔۔۔ہولے بول۔۔۔۔۔۔(اونچی آواز میں) جانے توکیا واہی تباہی بکتی ہے۔۔۔۔۔۔
(دور سے بلقیس کی ماں آتی ہے)’’بلقیس۔۔۔۔۔۔بلقیس‘‘
بلقیس: ثریا ۔۔۔۔۔۔لے یہ اکنی۔ دو پیسے کی املی لے لینا۔۔۔۔۔۔ پر یاد رکھ میں ہر روز املی کیلئے پیسے نہ دُوں گی۔۔۔۔۔۔اور دیکھ۔ آدھی میرے لیئے رکھ چھوڑنا۔۔۔۔۔۔امّی مجھے بلا رہی ہیں۔۔۔۔۔۔(بلند آواز میں)آئی۔۔۔۔۔۔ اور دیکھ ثریا! کسی سے ان باتوں کا ذکر نہ کیجیؤ۔سمجھ گئی؟۔۔۔۔۔۔ لے وہ خود ہی آرہی ہیں۔ تو بھاگ یہاں سے۔
بلقیس کی ماں:بلقیس۔۔۔۔۔۔یہ جو میں دو گھنٹے سے تجھے بلا رہی ہوں۔
تو نے کانوں میں روٹی ٹھونس رکھی ہے کیا۔
بلقیس: نہیں تو۔۔۔۔۔۔
ماں: اور یہ میں کیا سنتی ہوں۔
بلقیس: ۔۔۔۔۔۔کیا امی جان۔
ماں: کہ تو آج پھر باہر جانا چاہتی ہے۔۔۔۔۔۔میں کہتی ہوں لونڈوں کے ساتھ کدکڑے نہ لگا۔ شریف بہو بیٹیوں کی طرح تیرا گھر میں جی ہی نہیں لگتا۔ دیدے کا پانی ہی ڈھل گیا ہے۔ دہائی باوا۔ لوٹھاسی ہوگئی۔ طبیعت میں سے ابھی تک آوارہ گردی نہیں گئی۔۔۔۔۔۔ یاد رکھ وہ چار چوٹ مار پیٹیوں گی کہ تیرے بند بند ڈھیلے ہو جائیں۔۔۔۔۔۔یہ موئے کالج میں داخل کرکے میں نے بڑی سخت غلطی کی۔
بلقیس: آپ تو ناحق بگڑ رہی ہو۔
ماں: ابھی تیری اس سہیلی کے یہاں سے آدمی آیا تھا کہ بی بی جی تیار رہیں۔کالج کے جلسے میں جانا ہے۔
بلقیس: جلسے میں۔۔۔۔۔۔ارے سچ مچ۔۔۔۔۔۔میں تو بالکل بھول ہی گئی تھی۔ یہ جلسہ بہت ضروری ہے امی جان۔
ماں: جلسے اور جلوس جائیں بھاڑ میں۔۔۔۔۔۔ تو چل میرے ساتھ اور بیٹھ کے آٹا گوندھ۔
بلقیس: ۔۔۔۔۔۔پر امی جان۔۔۔۔۔۔
ماں: بلقیس میرے ساتھ آج کوئی بہانہ نہیں چلے گا۔۔۔۔۔۔ سمجھیں۔ آج تجھے آٹا گوندھنا ہی ہوگا۔
بلقیس: آٹا گوندھنے کے بعد تو مجھے اجازت دے دیجئے گانا۔
ماں: تو پہلے چل کر آٹا تو گوندھ۔۔۔۔۔۔ پھر دیکھوں گی۔۔۔۔۔۔چل۔۔۔۔۔۔
(اچانک)نہیں میں تجھے ہرگز اجازت نہ دُوں گی۔ جلسہ جائے جہنم میں۔۔۔۔۔۔اب مجھے یاد آیا۔ تو چار روز سے متواتر سیرسپاٹے کررہی ہے۔ کل سینما دیکھنے گئی تھی۔ پرسوں تیری اس سہیلی کے ہاں چائے تھی۔ اور۔۔۔۔۔۔اور۔۔۔۔۔۔لیکن تو مجھے باتوں میں نہ لگا۔ جا کام کر۔۔۔۔۔۔ بیٹھ جا یہاں میرے سامنے۔۔۔۔۔۔بیٹھ جا۔
بلقیس: پانی کہاں ہے۔
ماں: یہ تیرے پاس ہی تو پڑا ہے۔۔۔۔۔۔ اب تجھے سجھائی بھی کم دینے لگا ہے۔
بلقیس: پہلے یہ آٹا کس نے گوندھنا شروع کیا تھا۔
ماں: میں نے۔۔۔۔۔۔کیوں؟
بلقیس: (آٹا گوندھنے کی آواز)۔۔۔۔۔۔کچھ نہیں۔
(وقفہ۔۔۔۔۔۔آٹا گوندھنے کی آواز چند لمحات آتی رہی)
ماں: بلقیس۔ تو یہ مُکیاں مار رہی ہے کہ کسی کا سر سہلا رہی ہے۔ تیری مکیوں میں زور ہی نہیں۔ یوں آٹا کیا خاک گندھے گا۔۔۔۔۔۔ سر سے بلا ٹال رہی ہے۔
(دُور سے بلقیس کے بھائی کی آواز آتی ہے)۔’’امی جان ذرا ادھر آئیے گا۔‘‘
ماں: آتی ہوں۔
(بلقیس آٹا گوندھتی رہتی ہے)
بلقیس: (دھیمی آواز میں)ثُریّا۔۔۔۔۔۔۔ ذرا بات سُن۔
ثُریّا: (رازدارانہ لہجے میں)۔۔۔۔۔۔کیا ہے؟
بلقیس: جا دوڑ کے دیکھ ٹائم پیس میں وقت کیا ہوا ہے۔
(آٹا گوندھنے کی آواز)
بلقیس: یہ آٹا گوندھنا بھی کیا مصیبت ہے۔۔۔۔۔۔ ساری میری ساڑھی چرسوں سے بھر گئی ہے۔ اللہ کرے نہ رہے اس دنیا کے تختے پر۔ اس نابکار ماما کو بھی آج ہی اپنی بہن کے ہاں جانا تھا۔۔۔۔۔۔میرا ستیاناس ہو۔۔۔۔۔۔ یہ پانی کہاں سے آگیا۔۔۔۔۔۔خشکہ کہاں ہے۔۔۔۔۔۔؟
ثُریّا: آپا۔۔۔۔۔۔وقت میں دیکھ آئی ہوں۔
بلقیس: کیا بجا ہے؟
ثُریّا: سوا آٹھ۔
بلقیس: (گھبرا کر)سوا آٹھ۔۔۔۔۔۔تو صرف پندرہ منٹ باقی رہ گئے۔
ماں: (دُور سے) ثُریّا۔۔۔۔۔۔تو چل یہاں سے بھاگ۔۔۔۔۔۔بلقیس آٹا گوندھ لو تو بھائی کے کوٹ میں دو بٹن ٹانک دینا۔۔۔۔۔۔
بلقیس: آپ نے ٹانک دیئے ہوتے۔۔۔۔۔۔مجھے۔
ماں: (غصے میں)مجھے کیا؟
بلقیس: (تیز لہجے میں) کچھ نہیں۔۔۔۔۔۔آپ تو بس چاہتی ہیں کہ گلا گھونٹ دیں۔
بلقیس کا بھائی: بلقیس۔۔۔۔۔۔بلقیس!
بلقیس: آگ لگے بلقیس کی جان کو۔۔۔۔۔۔مر بھی نہیں چکتی یہ بلقیس۔
بھائی: ارے بھئی کیا ہوا۔۔۔۔۔۔کیا ہوا امی جان؟
ماں: اسی سے پوچھ لے۔
بھائی: کیا ہوا بلقیس؟
بلقیس: کچھ بھی نہیں ہوا۔۔۔۔۔۔تو کیا ہوا۔ میں نہیں جاؤں گی جلسے میں۔ بیٹھی آٹا گوندھتی رہوں گی۔ بٹن ٹانکتی رہوں گی۔۔۔۔۔۔سال بھر میں ایک بار جلسہ ہوتا ہے۔ اس میں جانے سے بھی آپ روکتی ہیں(سسکیاں )بھائی جان کہاں ہے آپ کا کوٹ۔ لائیے میں بٹن ٹانک دوں۔
بھائی: بھئی امی جان۔ یہ واقعی آپ بہت ظلم کررہی ہیں۔۔۔۔۔۔ جلسے میں بلقیس کو ضرور جانا چاہیئے۔ سب لڑکیاں جارہی ہیں۔
بلقیس: آپ کا کوٹ کہاں ہے۔۔۔۔۔۔(سسکیاں) نہیں میں نہیں جاؤں گی۔
ماں: سلیم۔ میں نے کب روکا ہے اسے۔۔۔۔۔۔بے شک جائے۔ پر گھر کے کام کاج بھی تو ہیں۔ مجھ اکیلی سے سب کچھ تھوڑے ہی ہوسکتا ہے۔
بلقیس: (سسکیاں) نہیں میں اب نہیں جاؤں گی۔۔۔۔۔۔آٹا میں نے گوندھ دیا ہے۔۔۔۔۔۔اب کوئی اور کام کرنے کو دے دیجئے۔
ماں: نہیں جاتی تو نہ جا۔۔۔۔۔۔ میری بلا سے۔ پرتو نے یہ ٹسوے بہانے کیا شروع کردیئے ہیں۔۔۔۔۔۔ سلیم تم اس کی بہت پچ لیتے ہو۔ تمہاری طرف داری نے اس کو بالکل بگاڑ رکھا ہے۔
بھائی: نہیں نہیں۔۔۔۔۔۔ امی جان یہ بات نہیں۔ بلقیس بڑی اچھی لڑکی ہے
۔۔۔۔۔۔(بلقیس سے) بلقیس۔ دیکھو۔ جو کام امی جان تم سے کہیں وہ کردو پھر چلی جانا۔
بلقیس: لیکن بھائی جان۔ مجھے تووہاں ٹھیک۔۔۔۔۔۔
بھائی: نو بجے پہنچنا ہے۔۔۔۔۔۔ نوبجے ہی تو پہنچنا ہے۔ مجھ سے ابھی سعید کہہ رہا تھا کہ جلسے کا وقت یوں تو سوا نو بجے مقرر ہے۔ مگر نو بجے اس کی بہن چلی جائے گی۔ تم نو نہیں تو پونے نو یہاں سے چلی جانا۔۔۔۔۔۔چلو۔ آؤ میرے کوٹ میں بٹن ٹانک دو۔
بلقیس: لیکن۔۔۔۔۔۔لیکن۔۔۔۔۔۔
بھائی: بس۔بس۔اب لڑائی ختم ہوگئی۔۔۔۔۔۔چلو میرے کوٹ میں بٹن ٹانک دو۔
بلقیس: چلیئے۔۔۔۔۔۔(وقفہ)۔۔۔۔۔۔(دھیمے لہجے میں) بھائی جان۔ آپ سے ایک بات کہوں۔۔۔۔۔۔مانئے گا؟۔۔۔۔۔۔نہیں آپ نہیں مانیں گے۔
بھائی: بھئی کمال ہے! آپ ہی یوں کہتی ہو۔ آپ ہی ووں کہتی ہو۔ پہلے بات تو بتاؤ۔
بلقیس: آپ کی گھڑی میں وقت کیا ہوا ہے۔
بھائی: آٹھ بج کر۔۔۔۔۔۔آٹھ انیس ہوئے ہیں)۔
بلقیس: (گھبرا کر) آٹھ انیس۔۔۔۔۔۔ تو آپ ایسا کیجئے آج کوئی اور کوٹ پہن لیجئے۔
اس وقت مجھ سے بٹن نہ ٹکوائیے۔۔۔۔۔۔ میرے اچھے بھائی جو ہوئے۔۔۔۔۔۔ مجھے وہاں ٹھیک ساڑھے آٹھ بجے پہنچ جانا ہے۔۔۔۔۔۔ تو اجازت ہے مجھے۔ امی جان کو تو آپ جانتے ہی ہیں مجھ پر کتنی بگڑ رہی تھیں۔۔۔۔۔۔ چند لڑکیوں کو وہاں جلدی اس لیئے بلوایا ہے کہ جلسے کا انتظام وغیرہ کیا جائے۔۔۔۔۔۔ اب اگرمیں بلانے پر بھی نہ گئی تو پرنسپل صاحبہ کیا کہیں گی۔۔۔۔۔۔ اور پھر جلسے سے تھوڑی دیر پہلے ذرا گپ بھی رہے گی۔۔۔۔۔۔ آپ کو تویہ سب باتیں معلوم ہیں۔ اسی واسطے آپ سے کہہ رہی ہوں۔۔۔۔۔۔ تو دوسرا کوٹ پہن لیجئے گا نا؟
بھائی: (ہنستا ہے)۔۔۔۔۔۔تم نے تو مجھے کچھ بولنے ہی نہیں دیا۔۔۔۔۔۔اب تمہاری خوشی اسی میں ہے تو میں دوسرا کوٹ پہن لوں گا۔۔۔۔۔۔ جاؤ۔ پر ایک شرط ہے کہ مجھے حمیدہ کی ساری باتیں جلسے سے واپس آکر سنانا ہوں گی کہ وہ کس قسم کے کپڑے پہن کر آئی تھیں۔ اور۔۔۔۔۔۔ایسی ہی چند اور باتیں۔۔۔۔۔۔بھئی ہماری اس سے شادی ہورہی ہے۔
بلقیس: (خوش ہوکر) میں وعدہ کرتی ہوں۔۔۔۔۔۔آپ دیکھ لیجئے گا فوٹو کھینچ دُوں گی۔۔۔۔۔۔فوٹو۔۔۔۔۔۔تو۔۔۔۔۔۔تو۔۔۔۔۔۔میں جاتی ہوں۔۔۔۔۔۔آپ امی جان سے کہہ دیجئے گا کہ اسے ضروری جانا تھا۔
بھائی: حمیدہ کو میرا سلام کہہ دینا۔
بلقیس: (جلدی میں)۔۔۔۔۔۔کہہ دوں گی۔۔۔۔۔۔(آواز دیتی ہے)ثُریّا۔۔۔۔۔۔
(قدموں کی چاپ)۔۔۔۔۔۔ثُریّا۔۔۔۔۔۔ہاں۔ بات سن ثُریّا۔۔۔۔۔۔
ثُریّا: کیا ہے۔
بلقیس: بڑے کمرے میں ابا جی تو نہیں بیٹھے ہوئے۔
ثُریّا: نہیں آپا۔۔۔۔۔۔ وہ ابھی کاغذ لے کر باہر نکلے ہیں۔
بلقیس: اچھا تو ایسا کر میرے لیئے ایک تانگہ منگوا دے۔۔۔۔۔۔ جلدی کر۔
ثُریّا: کرایہ کیا طے کیا جائے؟
بلقیس: تو کرائے ورائے کو چھوڑ۔۔۔۔۔۔میں خود طے کرلوں گی۔۔۔۔۔۔بھاگ اب
(تھوڑا وقفہ)
بلقیس: (گھبرا کر)کیا ہے؟۔۔۔۔۔۔کون تھا؟۔۔۔۔۔۔ کوئی بھی نہیں تھا۔ آج جانے مجھے کیا ہوگیا ہے۔۔۔۔۔۔۔میں اب یہاں کھڑی سوچ کیا رہی ہوں۔۔۔۔۔۔ کوئی چیز باقی رہ گئی ہے شائد۔۔۔۔۔۔ ہاں رومال۔۔۔۔۔۔(ہنستی ہے)۔۔۔۔۔۔رومال تو میرے ہاتھ میں ہے۔۔۔۔۔۔ذرا بال سنوار لوں۔۔۔۔۔۔کنگھی کہاں ہے؟۔۔۔۔۔۔ہٹاؤ۔ ایسے ہی چلتی ہوں(دُور سے بلقیس کے باپ کی آواز آتی ہے)
باپ: بلقیس۔۔۔۔۔۔(آواز قریب آجاتی ہے)بلقیس!بیٹا۔
بلقیس: (گھبرا کر)۔۔۔۔۔۔جی ابّا جی۔
باپ: تو یہاں کھڑی کیا کررہی ہے۔۔۔۔۔۔ادھر آ۔۔۔۔۔۔اپنا قلم لے کر میرے کمرے میں آ۔
بلقیس: ۔۔۔۔۔۔لیکن ابا جی۔۔۔۔۔۔
باپ: وہ نیلا پیڈ بھی لیتی آنا۔
(قدموں کی چاپ۔۔۔۔۔۔وقفہ)
بلقیس: (تنگ آکر) میں یہاں سے چلی کیوں نہ گئی۔۔۔۔۔۔ اب جانے وہ مجھ سے کیا لکھوانا شروع کردیں گے۔۔۔۔۔۔ثُریّا۔
ثُریّا: آپا۔۔۔۔۔۔تانگہ آگیا۔۔۔۔۔۔گلی کے باہر کھڑا ہے۔ آپ جلدی جائیے۔ وہ زیادہ دیر رکے گا نہیں۔
بلقیس: تو ایسا کر۔ یہاں کھڑی رہ جب ابا جی مجھے بلائیں تو کہہ دینا وہ جلدی جلدی میں کالج چلی گئی ہیں۔
باپ: (دُور سے آواز آتی ہے)بلقیس بیٹا!
(بلقیس جواب نہیں دیتی)
ثُریّا: (سرگوشی میں) کہہ دُوں۔ چلی گئی ہیں۔
(باپ خود آجاتا ہے)
باپ: بلقیس!
بلقیس: (گھبرا کر)۔۔۔۔۔۔جی ابا جی۔
باپ: میں نے تجھ سے کیاکہا تھا۔
بلقیس: مجھے یاد ہے ابا جی۔۔۔۔۔۔ میں ثُریّا سے اپنے قلم کی بابت ہی پوچھ رہی تھی۔ جانے کہاں گُم ہوگیا ہے۔ وقت کے وقت یوں ہی چیزیں گُم ہو جایا کرتی ہیں اور مجھے ٹھیک ساڑھے آٹھ بجے جلسے میں پہنچ جانا ہے۔
باپ: تو ابھی کافی وقت پڑا ہے۔۔۔۔۔۔ مجھے صرف ایک خط لکھوانا ہے۔۔۔۔۔۔
شاباش بیٹا آؤ میرے ساتھ۔۔۔۔۔۔اپنا قلم پھر ڈھونڈ لینا۔۔۔۔۔۔ میرے قلم سے تم لکھ لیا کرتی ہو۔
بلقیس: ابا جی۔
باپ: کیا ہے؟
بلقیس: بھائی جان سے آپ کیوں نہیں کہتے۔ وہ آپ کو لکھ دیں گے۔
باپ: نہیں بلقیس۔ وہ بڑا بدخط ہے۔اس کے علاوہ بہت سی باتیں وہ اپنی طرف سے لکھ دیا کرتا ہے۔۔۔۔۔۔صرف دوتین منٹ کا کام ہے آؤ۔۔۔۔۔۔اب بہانے نہ بناؤ۔ چلو۔
بلقیس: چلیئے۔۔۔۔۔۔(ثُریّاسے سرگوشی میں) تو تانگے والے سے جا کے یہ کہہ دے کر وہ کپڑے تبدیل کررہی ہیں۔ ابھی آتی ہیں۔
باپ: جلسے جانا ہے تو جلدی آؤ۔
(وقفہ۔۔۔۔۔۔کاغذ کی کھڑکھڑاہٹ)
باپ: اچھا۔۔۔۔۔۔دیکھ لو کاغذ پر کوئی داغ دھباّ تو نہیں۔
بلقیس: جی نہیں بالکل صاف ہے۔
باپ: میرا مطلب ہے تم نے کنگھی ونگھی کی ہوگی۔ ہاتھوں کو تیل لگا ہوگا۔ یہ کاغذ نیچے رکھ لو(کاغذ کی کھڑکھڑاہٹ)
بلقیس: آپ اب لکھوانا شروع کیجئے۔
باپ: ٹھہرو۔ مجھے مضمون بنا لینے دو۔۔۔۔۔۔ ہاں۔ تو لکھو۔۔۔۔۔۔ عزیز من۔۔۔۔۔۔
میرا وہ عزیز ہی تو ہے۔۔۔۔۔۔اپنے نثار احمد کی بابت کہہ رہا ہوں۔۔۔۔۔۔میرا اپنا تو تم نے لکھ دیا ہوگا۔
بلقیس: جی ہاں۔
باپ: انگریزی میں لکھنا چاہیئے تھا۔ اس لیئے کہ اردو میں لکھو گی تو اس کی سمجھ میں نہ آئے گا۔
بلقیس: انگریزی ہی میں لکھا ہے۔۔۔۔۔۔ہاں تو لکھوائیے۔۔۔۔۔۔ عزیز من
باپ: بعد دعائے عمر درازی کے واضح ہو کہ ہم بخیریت ہیں اور تمہاری خیریت خدا وند تعالیٰ سے نیک مطلوب ہے۔۔۔۔۔۔لکھ لیا!
بلقیس: نیک مطلوب ہے۔۔۔۔۔۔لکھ لیا۔
باپ: صورت احوال یہ ہے۔
بلقیس: صورت احوال یہ ہے کہ۔۔۔۔۔۔(ہولے سے)۔۔۔۔۔۔عجب مصیبت ہے۔
باپ: کیا کہا؟
بلقیس: کچھ نہیں۔۔۔۔۔۔آپ آگے لکھوائیے۔
(وقفہ)
(بلقیس اضطراب میں ٹانگ ہلانا شروع کردیتی ہے۔ اس کی آواز آتی ہے)
باپ: صورت احوال یہ ہے۔۔۔۔۔۔تمہاری ماں کہاں ہے؟
(ٹانگ زور سے ہلتی ہے)
بلیقس: وہ پڑوسن کے یہاں گئی ہیں۔
(وقفہ)
باپ: اس کو بھی تو کچھ لکھوانا تھا۔
بلقیس: آپ کو جو لکھوانا ہے وہ تولکھوا دیجئے۔۔۔۔۔۔ لکھوائیے۔
باپ: لکھواؤں کیا خاک۔۔۔۔۔۔ تمہاری ٹانگ اس زور سے ہل رہی ہے کہ۔۔۔۔۔۔
(ٹانگ ہلنے کی آواز)
بلقیس: میری۔۔۔۔۔۔میری ٹانگ۔۔۔۔۔۔(ہلنے کی آوازبُلند ہوجاتی ہے) اوہ۔۔۔۔۔۔اچھا تو اب لکھوائیے۔۔۔۔۔۔ خدا کے لیئے جلدی کیجئے۔
(ٹانگ پھر ہلتی ہے)
باپ: تم ٹانگ ہلانا بند کرو۔
بلقیس: (ٹانگ تو ہلتی رہتی ہے)۔۔۔۔۔۔اب کہاں ہلتی ہے۔۔۔۔۔۔آپ لکھوائیے۔
باپ: لکھو۔۔۔۔۔۔ جب سے تم گئے ہو۔ یہاں بلا کی گرمی پڑ رہی ہے۔ لوگوں کو دھڑا دھڑ سن اسٹروک ہورہا ہے۔۔۔۔۔۔ میں گھر سے بالکل باہر نہیں نکلتا۔ گرمی کی انتہا یہ ہے کہ میرے تین دو باز مر گئے ہیں۔ جو دو سورج مکھی تھے وہ مرنے کے قریب ہیں۔ تم جب گرمیوں کے بعد یہاں آؤ تو چار پانچ لقے ضرور لیتے آنا۔۔۔۔۔۔ لکھ لیا!
بلقیس: جی ہاں۔۔۔۔۔۔چار پانچ لقے ضرور لیتے آنا۔۔۔۔۔۔بس؟
باپ: نہیں ابھی نہیں۔۔۔۔۔۔لکھو۔۔۔۔۔۔تمہارا لوہے کاٹرنک محفوظ پڑا ہے۔ اس کا تالا ٹوٹا ہوا تھا جو میں نے بنوا دیا ہے۔ کہوتو اس پر روغن بھی کرا دوں۔ میرے خیال میں کالا اچھا رہے گا۔
بلقیس: کالا اچھا رہے گا۔۔۔۔۔۔اپنی ماں کو میرا سلام کہنا۔ بچوں کو۔۔۔۔۔۔پیار
باپ: ہاں بچوں کو پیار۔۔۔۔۔۔(دفعتاً چونک کر)۔۔۔۔۔۔مگر یہ تم نے خط کیوں بند کردیا۔مجھے ابھی تو اور بہت سی باتیں لکھوانا تھیں۔۔۔۔۔۔تمہاری ماں کہاں ہے؟
بلقیس: ہمسائی کے یہاں گئی ہے۔۔۔۔۔۔بخدمت جناب نثار احمد صاحب بلڈنگ کنٹریکٹر۔۔۔۔۔۔کوٹھی نمبر تین۔ راولپنڈی۔۔۔۔۔۔یہ لیجئے لفافے پر پتا بھی لکھ دیا۔۔۔۔۔۔ثُریّا سے کہتی ہوں ابھی پوسٹ کرادے۔۔۔۔۔۔ اچھا تو میں اب جاتی ہوں۔
باپ: ہاں۔ اسے ابھی پوسٹ کرادو۔۔۔۔۔۔ تمہارے بھائی کو دوں گا تو اس کی جیب ہی میں پڑا رہے گا۔۔۔۔۔۔مگر بات تو سُن بلقیس۔۔۔۔۔۔میں سمجھتا ہوں بہت سی باتیں رہ گئی ہیں۔
بلقیس: وہ امی جان اپنے خط میں لکھوا دیں گی۔۔۔۔۔۔ اچھا ابا جی میں اب چلتی ہوں
(تیز قدموں کی آواز۔۔۔۔۔۔چند لمحات کے بعد۔۔۔۔۔۔) بس اب دوڑ بلقیس۔۔۔۔۔۔ساڑھے آٹھ بجنے ہی والے ہیں۔
(گھڑی کی ٹک ٹک سُنائی دے۔۔۔۔۔۔)
دوسرا منظر
منتظر: میں بیمار ہوں۔۔۔۔۔۔ سخت بیمار ہوں۔ آپ۔۔۔۔۔۔آپ۔۔۔۔۔۔اوہ ساڑھے آٹھ بجنے والے ہیں۔
دوست: (فکر مند لہجے میں)تم بیمار ہو۔ لیکن بھئی عجیب بیوقوف ہو۔ مجھ سے تم نے پہلے کیوں نہ کہا۔ اب اطمینان سے اپنا سارا حال سناؤ۔ مجھے کوئی خدمت بتاؤ۔۔۔۔۔۔بھئی واللہ کمال کردیا۔۔۔۔۔۔ اور ہاں یہ ساڑھے آٹھ بجے تم نے کیا کہا تھا۔
منتظر: (مُردہ آواز ) میں ساڑھے آٹھ بجے۔۔۔۔۔۔ساڑھے آٹھ بجے مجھے دوا پینی ہے۔
دوست: لاؤ میں پلا دیتا ہوں۔ کہا ں ہے دوا۔۔۔۔۔۔ ساڑھے آٹھ بجنے میں اب کون سی دیر ہے۔۔۔۔۔۔ دوا کہاں ہے؟
منتظر: نہیں۔ نہیں۔ میں خود پی لوں گا۔۔۔۔۔۔ آپ تکلیف نہ کریں۔۔۔۔۔۔ آپ۔۔۔۔۔۔آپ۔۔۔۔۔۔آپ جائیے۔
دوست: میں تمہیں بیمار چھوڑ کر کیسے جاسکتا ہوں۔
منتظر: میں۔۔۔۔۔۔میں۔۔۔۔۔۔ میں بیمار نہیں ہوں۔۔۔۔۔۔میں ابھی ٹھیک ہو جاؤں گا آپ جائیے۔۔۔۔۔۔ اور خدا کے لیئے آپ جائیے۔۔۔۔۔۔ مجھے دل کا دورہ پڑ جائے گا۔
دوست: دل کا دورہ۔۔۔۔۔۔بھئی اب تو میں ہرگز نہیں جاؤں گا۔۔۔۔۔۔بتاؤ دوا کہاں ہے؟
منتظر: دوا میرے پاس نہیں ہے۔۔۔۔۔۔ آپ جائیے۔ خدا کے لیئے جائیے۔
دوست: تمہیں اس حالت میں چھوڑ کر میں ڈاکٹر کے پاس بھی تو نہیں جاسکتا۔
منتظر: کیا کہا(اضطراب بڑھتا جائے) آپ ڈاکٹر کے پاس بھی نہیں جائیں گے میں۔۔۔۔۔۔میں۔۔۔۔۔۔مر جاؤں گا۔۔۔۔۔۔ خدا کے لیئے ڈاکٹر کے پاس دوڑے جائیے۔ میری حالت بہت خراب ہے۔۔۔۔۔۔میری۔۔۔۔۔۔حالت۔۔۔۔۔۔بہت۔۔۔۔۔۔ نازک۔۔۔۔۔۔ہے۔۔۔۔۔۔جائیے۔۔۔۔۔۔(آواز کمزور ہو جاتی ہے)
دوست: غشی طاری ہوگئی۔۔۔۔۔۔کیا ہوا۔۔۔۔۔۔ڈاکٹر کہاں ملے گا۔۔۔۔۔۔(دروازہ کھولنے کی آواز۔۔۔۔۔۔ گھبراہٹ کے ساتھ باہر جانے کی آواز) اب کوئی ڈ اکٹر مل جائے۔۔۔۔۔۔
(گھڑی کی ٹک ٹک۔۔۔۔۔۔آخر میں کلا ک میں خرخراہٹ پیدا ہو اور ایک ٹن کی آواز آئے۔ اس ٹن کی گونج تھوڑی دیر تک سنائی دیتی رہے۔۔۔۔۔۔(گھڑی کی ٹک ٹک بند ہو جائے۔ ایک سیکنڈ تک مکمل خاموشی طاری رہے۔۔۔۔۔۔اس خاموشی کے بعد دروازہ کھلے اور بلقیس داخل ہو)۔
بلقیس: ہیں تو وہی۔۔۔۔۔۔لیکن دیکھئے کس مزے سے جناب سو رہے ہیں۔ گویا ان کو معلوم ہی نہیں کہ میں آرہی ہوں۔۔۔۔۔۔ کافی گہری نیند سو رہے ہیں۔۔۔۔۔۔خدا جانے کہاں سے گھومتے گھامتے تھک کر آئے ہوں گے(خفگی کے ساتھ) تو مجھے کیا ضرورت پڑی ہے کہ یہاں بن بلائے مہمانوں کی طرح کھڑی رہوں۔۔۔۔۔۔
(ہولے ہولے دروازہ بند کرنے کی آواز)
فیڈ آؤٹ
مأخذ :کتاب : منٹو کے ڈرامے اشاعت : 1942
مصنف:سعادت حسن منٹو
مزید ڈرامے پڑھنے کے لیے کلک کریں۔
