مجھے ان سے محبت ہو گئی ہے

- Advertisement -

مجھے ان سے محبت ہو گئی ہے

میری بھی کوئی قیمت ہو گئی ہے

وہ جب سے ملتفت مجھ سے ہوئے ہیں

یہ دنیا خوب صورت ہو گئی ہے

چڑھایا جا رہا ہوں دار پر میں

- Advertisement -

بیاں مجھ سے حقیقت ہو گئی ہے

رواں دریا ہیں انسانی لہو کے

مگر پانی کی قلت ہو گئی ہے

مجھے بھی اک ستم گر کے کرم سے

ستم سہنے کی عادت ہو گئی ہے

حقیقت یہ ہے ہم کیا اٹھ گئے ہیں

وفا دنیا سے رخصت ہو گئی ہے

غم جاناں میں جب سے مبتلا ہوں

غم دوراں سے فرصت ہو گئی ہے

اب ان کی کفر سامانی بھی آتشؔ

دل و جاں پر عبارت ہو گئی ہے

مأخذ : کتاب : Jada-e-manzil (Pg. 69) Author : Atish Bahawalpuri مطبع : Nirali Duniya Publications (2001) اشاعت : 2001

شاعر:آتش بہاولپوری

مزید غزلیں پڑھنے کے لیے کلک کریں۔

- Advertisement -